នារសៀលថ្ងៃសុក្រ ទី២០ ខែកញ្ញា ឆ្នាំ២០២៤ ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានទទួលជួបសំដែងការគួរសម និងពិភាក្សាការងារជាមួយលោកស្រី Ilona Kuhangel នាយិកាអង្គការវេទិការសេវាសន្តិភាពស៊ីវិល (forumZFD) ប្រចាំកម្ពុជា ដោយមានការអញ្ជើញចូលរួមលោកនាយករង ថ្នាក់ដឹកនាំមហាវិទ្យាល័យនៃវិទ្យាស្ថានគរុកោសល្យបាត់ដំបង។ឆ្លៀងក្នុងឱកាសនៃការប្រារព្ធពិធី “ទិវាសន្តិភាពពិភពលោក” ឆ្នាំ២០២៤ នៅក្នុងខេត្តបាត់ដំបងលោកស្រី Ilona Kuhangel បានអញ្ជើញចូលធ្វើទស្សនកិច្ចនៅ វ.គ.ប និងជួបពិភាក្សាការងារជាមួយថ្នាក់ដឹកនាំវិទ្យាស្ថាន។លោកស្រីនាយិកាអង្គការforumZFDប្រចាំកម្ពុជា សូមវាយតម្លៃខ្ពស់ចំពោះកិច្ចសហប្រតិបត្តិការរវាង វ.គ.ប និងអង្គការforumZFDប្រចាំកម្ពុជា នាពេលកន្លងមកស្របតាមស្មារតីនៃកិច្ចព្រមព្រៀងរវាង វ.គ.ប និងអង្គការforumZFD សំដៅដល់ការកសាងភាពជាដៃគូរក្នុងការបណ្តុះបណ្តាល និងលើកម្ពស់ការយល់ដឹងពីការអប់រំសន្តិភាពតាមគ្រឹះស្ថានសិក្សានៅខេត្តបាត់ដំបង។តាងនាមឱ្យគណៈគ្រប់គ្រងវិទ្យាស្ថាន ឯកឧត្តមបណ្ឌិត ជា រដ្ឋា បានធ្វើការថ្លែងអំណរគុណជាពិសេសដល់អង្គការ forumZFD ដែលបានផ្តល់ការគាំទ្រទាំងបច្ចេកទេស និងថិវកា លើកការអភិវឌ្ឍធនធានមនុស្ស និងការផ្សព្វផ្សាយលើកការយល់ដឹងពីការរក្សាសន្តិភាព ពិសេសតាមរយៈការចងក្រងបណ្តាញការអប់រំសន្តិភាពនៅក្នុងខេត្តបាត់ដំបង។ការអប់រំពីសន្តិភាពពិតជាមានសារៈសំខាន់ណាស់សម្រាប់លោកគ្រូ-អ្នកគ្រូ និងប្អូនៗគរុនិស្សិតនៃវិទ្យាស្ថានគរុកោសល្យបាត់ដំបង ដែលជាបុព្វហេតុរួមចំណែកក្នុងការរក្សាសន្តិភាព និងសេ្ថរភាពសង្គម ដែលជាធាតុផ្សំចំបាច់ខ្វះមិនបានក្នុងការអភិវឌ្ឍសង្គម-សេដ្ឋកិច្ចកម្ពុជា ពិសេសសម្រេចចក្ខុវិស័យកម្ពុជាឆ្នាំ២០៥០ជាប្រទេសមានប្រាក់ចំណូលកម្រិតខ្ពស់។ ក្រោមម្លប់សន្តិភាព វិស័យអប់រំនៅកម្ពុជា បានអភិវឌ្ឍប្រសើរឡើងជាលំដាប់ ពិសេសកំណែទម្រង់ការប្រឡងគ្រប់ទម្រង់ ស្តង់ដាសាលារៀនគំរូ និងការធ្វើឱ្យប្រសើរឡើងនៅការបណ្តុះបណ្តាលគ្រូបង្រៀនដែលជាឆ្អឹងខ្នងនៃគុណភាពនៃការអប់រំ។ សមិទ្ធផលទាំងនេះកើតចេញពីសុខសន្តិភាពពេញលេញ និងស្ថេរភាពសង្គម-សេដ្ឋកិច្ច ដែលរាជរដ្ឋាភិបាលកម្ពុជាបានខិតខំប្រឹងប្រែងស្វែងរកដោយលំបាក។ ជាថ្មីម្តងទៀត ឯកឧត្តមបណ្ឌិតនាយកវិទ្យាស្ថាន សូមថ្លែងអំណរគុណដល់ លោកស្រីនាយិកាអង្គការforumZFDប្រចាំកម្ពុជា ដែលបានចំណយពេលវេលាដ៏មានតម្លៃចូលទស្សនកិច្ចវិទ្យាស្ថាន និងជួបប្រជុំជាមួយគណៈគ្រប់គ្រងវិទ្យាស្ថាន សូមឱ្យបេសកកម្មរបស់លោកស្រីនាយិកាប្រកបដោយភាពជោគជ័យនៅទឹកដីនៃខេត្តបាត់ដំបង។

២០ កញ្ញា ២០២៤ | ខេត្តបាតដំបង

-------------------------

---

ភ្ជាប់ទំនាក់ទំនងជាមួយពួកយើង

📞017 448 869/ 096 3 296 997

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia