កិច្ចប្រជុំផ្សព្វផ្សាយស្ដីពីកម្មវិធីពង្រឹងសមត្ថភាពភាសាអង់គ្លេសសម្រាប់គ្រូបង្រៀននៅកម្រិតបឋមសិក្សា

នាថ្ងៃពុធ ៥រោច ខែពិសាខ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៦ ខែឧសភា ឆ្នាំ២០២៦ វិទ្យាស្ថានគរុកោសល្យបាត់ដំបង បានសហការជាមួយអង្គការគាំទ្រការអភិវឌ្ឍសមត្ថភាពគ្រូបង្រៀន (TDSO) រៀបចំកិច្ចប្រជុំផ្សព្វផ្សាយស្ដីពី «កម្មវិធីពង្រឹងសមត្ថភាពភាសាអង់គ្លេសសម្រាប់គ្រូបង្រៀននៅកម្រិតបឋមសិក្សា» ក្រោមអធិបតីភាព លោកជំទាវបណ្ឌិត ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង លោក សុន ណាត នាយកប្រតិបត្តិអង្គការ TDSO លោក ភោគ រិទ្ធា តំណាងមន្ទីរអប់រំ យុវជន និងកីឡាខេត្តបាត់ដំបង លោក ទ្រី ហាក់ ប្រធានការិយាល័យអប់រំ យុវជន និងកីឡាក្រុងបាត់ដំបង ព្រមទាំងលោកនាយក នាយិកាសាលាបឋមសិក្សានានាក្នុងក្រុងបាត់ដំបង។
កម្មវិធីនេះរៀបចំឡើងក្នុងវត្ថុបំណង៖
១. បន្ស៊ីកម្មវិធីទៅនឹងយុទ្ធសាស្ត្របញ្ចកោណរបស់រាជរដ្ឋាភិបាល។
២. ផ្សព្វផ្សាយអំពីក្របខណ្ឌពេលវេលានៃការអនុវត្តកម្មវិធីពង្រឹងសមត្ថភាពវិធីសាស្ត្របង្រៀន និងរៀនភាសាអង់គ្លេសសម្រាប់គ្រូនៅកម្រិតបឋមសិក្សា។
៣. ពង្រឹងកិច្ចសហប្រតិបត្តិការ និងការចូលរួមរបស់អ្នកពាក់ព័ន្ធក្នុងដំណើរការអនុវត្តកម្មវិធីឱ្យមានគុណភាព និងនិរន្តរភាព។
ក្នុងឱកាសនេះ ឯកឧត្តមបណ្ឌិត ជា រដ្ឋា បានបង្ហាញពីសក្ដានុពលនៃវិទ្យាស្ថានគរុកោសល្យបាត់ដំបង ក្នុងការឆ្លើយតបទៅនឹងកំណែទម្រង់របស់ក្រសួងអប់រំ យុវជន និងកីឡា។ វិទ្យាស្ថានបានកំណត់គោលការណ៍ច្បាស់លាស់សម្រាប់គរុនិស្សិតទាំងអស់ ត្រូវតែមានកម្រិតសមត្ថភាព Intermediate (B1) នៅពេលបញ្ចប់ការសិក្សា និងបានរៀបចំតេស្តវាស់កម្រិតយល់ដឹងភាសាអង់គ្លេស (BEPT Test) ជាប្រចាំ។ ទន្ទឹមនឹងនេះ ឯកឧត្តមបណ្ឌិត ក៏បានបញ្ជាក់ពីការបន្តគាំទ្រយ៉ាងពេញទំហឹងដល់សកម្មភាពរបស់អង្គការ TDSO ក្នុងការជំរុញសមត្ថភាពរៀន និងបង្រៀនភាសាអង់គ្លេសសម្រាប់គ្រូបង្រៀននៅកម្រិតបឋមសិក្សាផងដែរ។

បាត់ដំបង| ៦ ឧសភា ២០២៦

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia