ពិធីបើកវគ្គសិក្សាខ្លីលើកទី១១ នៅវិទ្យាស្ថានគរុកោសល្យបាត់ដំបង ស្ដីពី «គរុកោសល្យ និងវិធីសាស្ត្របង្រៀនបែបថ្មី» (CPD) នៃវិទ្យាស្ថានគរុកោសល្យបាត់ដំបង

នាព្រឹកថ្ងៃសៅរ៍ ៩កើត ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២២ ខែសីហា ឆ្នាំ២០២៦ វិទ្យាស្ថានគរុកោសល្យបាត់ដំបង បានរៀបចំ «កម្មវិធីបើកវគ្គសិក្សាខ្លីទី១១ ស្ដីពី គរុកោសល្យ និងវិធីសាស្ត្របង្រៀនបែបថ្មី (CPD)» ក្រោមអធិបតីភាព ឯកឧត្ដមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង និងជាប្រធានគណៈកម្មការវគ្គសិក្សាខ្លី ព្រមទាំងមានការអញ្ជើញចូលរួមពីសំណាក់ លោកនាយករង លោកព្រឹទ្ធបុរស លោកគ្រូ-អ្នកគ្រូឧទ្ទេស និងសិក្ខាកាមនៃវគ្គសិក្សាខ្លីទី១១ផងដែរ។ ក្នុងឱកាសនោះ កម្មវិធីបានដំណើរការដោយមាន ការរាយការណ៍សង្ខេបអំពីដំណើរការរៀបចំ និងគោលបំណងនៃវគ្គសិក្សាខ្លីទី១១ ព្រមទាំងការណែនាំលម្អិតអំពីយន្តការ និងកម្រិតវិនិច្ឆ័យនៃការវាយតម្លៃវគ្គសិក្សាខ្លីរបស់វិទ្យាស្ថាន ដោយ លោក សុន សុគន្ធ ព្រឹទ្ធបុរសមហាវិទ្យាស្រាវជ្រាវគរុកោសល្យ និងជាប្រធានវគ្គសិក្សាខ្លី។ ជាមួយគ្នានេះ ឯកឧត្ដមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានសំណេះសំណាល និងប្រកាសបើកវគ្គសិក្សាជាផ្លូវការនៃវគ្គសិក្សាខ្លីទី១១ ស្ដីពី «គរុកោសល្យ និងវិធីសាស្ត្របង្រៀនបែបថ្មី (CPD)»។ ឯកឧត្ដមនាយក ក៏បានសម្តែងនូវការកោតសរសើរយ៉ាងជ្រាលជ្រៅចំពោះមនសិការវិជ្ជាជីវៈរបស់សិក្ខាកាមទាំងអស់ និងបានវាយតម្លៃខ្ពស់ចំពោះស្មារតីខិតខំប្រឹងប្រែងបន្តអភិវឌ្ឍសមត្ថភាពខ្លួនឯងជាប្រចាំ ដើម្បីរួមចំណែកលើកកម្ពស់គុណភាពនៃការអប់រំឱ្យកាន់តែប្រសើរឡើង។ វិទ្យាស្ថានសូមជូនពរដល់សិក្ខាកាមទាំងអស់ ទទួលបានជោគជ័យ និងក្រសោបបានចំណេះដឹង និងវិធីសាស្ត្របង្រៀនថ្មីៗប្រកបដោយផ្លែផ្កា ដើម្បីយកទៅអនុវត្តក្នុងវិជ្ជាជីវៈឱ្យកាន់តែមានប្រសិទ្ធភាព។

២២ សីហា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia