ពិធីប្រកាសដាក់ឱ្យអនុវត្តជាផ្លូវការ “គម្រោងអភិវឌ្ឍសុខភាពសិក្សាសម្រាប់កុមារកម្ពុជា” ដំណាក់កាលទី២ (២០២៦-២០២៨) និងពិធីចុះអនុស្សរណៈនៃការយោគយល់គ្នារវាងអង្គការ STEP ជាមួយ វិទ្យាស្ថានគរុកោសល្យបាត់ដំបង និងរាជធានីភ្នំពេញ

នៅថ្ងៃព្រហស្បតិ៍ ១កើត ខែចេត្រ ឆ្នាំម្សាញ់ សប្ដស័ក ពុទ្ធសករាជ ២៥៦៩ ត្រូវនឹងថ្ងៃទី ១៩ ខែមីនា ឆ្នាំ២០២៦ ឯកឧត្ដមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានចូលរួមកម្មវិធីប្រកាសដាក់ឱ្យអនុវត្តជាផ្លូវការ “គម្រោងអភិវឌ្ឍសុខភាពសិក្សាសម្រាប់កុមារកម្ពុជា” ដំណាក់កាលទី២ (២០២៦-២០២៨) ក្រោមការគាំទ្រថវិកាដោយមូលនិធិនីប៉ុន (The Nippon Foundation) និងពិធីចុះអនុស្សរណៈនៃការយោគយល់គ្នារវាងអង្គការ STEP ជាមួយ វិទ្យាស្ថានគរុកោសល្យបាត់ដំបង និងរាជធានីភ្នំពេញ ក្រោមអធិបតីភាព លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា។ កម្មវិធីនេះក៏មានការអញ្ជើញចូលរួមផងដែរពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំយុវជននិងកីឡា គណៈគ្រប់គ្រង គ្រូឧទ្ទេសវិទ្យាស្ថានគរុកោសល្យទាំងពីរ និងក្រុមការងារអង្គការ STEP។ ចំពោះលទ្ធផលសំខាន់ៗមួយចំនួនដែលសម្រេចបាននៅដំណាក់កាលទី១ មានដូចជា ការចងក្រងសៀវភោសិក្សាគោល ការអភិវឌ្ឍឯកសារបង្រៀននិងរៀន ការបំប៉នសមត្ថភាពគ្រូឧទ្ទេសនិងគ្រូបង្រៀន ការបណ្ដុះបណ្ដាលគរុនិស្សិតនិងសិស្សានុសិស្ស លើមុខវិជ្ជាសុខភាពសិក្សា ក៏ដូចជាការបង្កើនការយល់ដឹងអំពីសុខភាព អនាម័យក្នុងសាលារៀន។ ដោយឡែកចំពោះដំណាក់កាលទី២ ដែលមានរយៈពេល ៣ឆ្នាំ នេះ(២០២៦-២០២៨) ការសហការរវាងវិទ្យាស្ថានគរុកោសល្យជាមួយអង្គការ STEP ត្រូវបានបន្តនិងពង្រីកដោយផ្តោតលើសកម្មភាពមួយចំនួនដូចជា (១) ការបំប៉នសមត្ថភាពគ្រូឧទ្ទេសសុខភាពសិក្សា ដែលជាគន្លឹះសម្រាប់ធានាបាននូវគុណភាពបង្រៀន និងការផ្ទេរចំណេះដឹងទៅកាន់សិស្សានុសិស្ស និងក្មេងៗជំនាន់ក្រោយ។ (២) ការកសាងឯកសារគោលមុខវិជ្ជាសុខភាពសិក្សាសម្រាប់បណ្ដុះបណ្ដាលគ្រូមធ្យមសិក្សាដែលមានចំនួន២៤ក្រេឌីត (៣) កម្មវិធីកម្មសិក្សាគរុកោសល្យ ដើម្បីឱ្យគរុនិស្សិតបឋមសិក្សា អាចពង្រឹង និងអនុវត្តជាក់ស្តែងនូវចំណេះដឹង និងជំនាញដែលបានសិក្សាកន្លងមក និង (៤) ការកែលម្អកម្មវិធីសិក្សាលម្អិតលើមុខវិជ្ជាសុខភាពសិក្សា ដើម្បីធានាថា កម្មវិធីសិក្សាមានភាពទាន់សម័យ សមស្រប និងអាចឆ្លើយតបទៅនឹងបញ្ហាសុខភាពដែលកុមារនិងយុវជនកម្ពុជាកំពុងប្រឈមនាពេលបច្ចុប្បន្ន។
រូបភាព: គេហទំព័រ ក្រសួងអប់រំ យុវជន និងកីឡា

១៩ មីនា ២០២៦ | រាជធានីភ្នំពេញ

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia