កម្មវិធីប្រគល់ឧបករណ៍ភ្លេង ជូនវិទ្យាស្ថានគរុកោសល្យបាត់ដំបង ពីអង្គការ iPVAJ ប្រទេសជប៉ុន

នារសៀលថ្ងៃអង្គារ ៦រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៤ ខែសីហា ឆ្នាំ២០២៦ ឯកឧត្ដមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានទទួលស្វាគមន៍ លោកជំទាវ Ishii Megumi សមាជិកព្រឹទ្ធសភា និងជាទីប្រឹក្សាគម្រោង iPVAJ, ឯកឧត្តម ពឹង គិមឆេន អនុរដ្ឋលេខាធិការ នៃក្រសួងអប់រំ យុវជន និងកីឡា, លោក Jufuku Takato អ្នកតំណាងគម្រោង iPVAJ និងគណៈគ្រប់គ្រងនៃគម្រោង iPVAJ ប្រទេសជប៉ុន ក្នុងពិធីប្រគល់ និងទទួលឧបករណ៍ភ្លេងព្យានីកា (Harmonica) ចំនួន ១០០ គ្រឿង ជូនដល់វិទ្យាស្ថានគរុកោសល្យបាត់ដំបង។
កម្មវិធីនេះក៏មានការអញ្ជើញចូលរួមពីសំណាក់ លោកនាយករង លោក-លោកស្រីព្រឹទ្ធបុរស ព្រឹទ្ធបុរសរង លោក-លោកស្រីប្រធានការិយាល័យស្ដីទី អនុប្រធានដេប៉ាតឺម៉ង់ លោកគ្រូ-អ្នកគ្រូឧទ្ទេស អ្នកស្ម័គ្រចិត្តបរទេស និងគរុនិស្សិតនៃវិទ្យាស្ថានគរុកោសល្យបាត់ដំបង។
តាមរយៈកិច្ចសម្របសម្រួលរបស់ឯកឧត្តម ពឹង គិមឆេន អនុរដ្ឋលេខាធិការ នៃក្រសួងអប់រំ យុវជន និងកីឡា គម្រោង iPVAJ នៃប្រទេសជប៉ុន បានផ្តល់ការឧបត្ថម្ភនូវ ឧបករណ៍ភ្លេងព្យានីកា (Harmonica) ចំនួន ១០០ គ្រឿង ជូនដល់វិទ្យាស្ថានគរុកោសល្យបាត់ដំបង។ ការផ្តល់ជូនឧបករណ៍ភ្លេងនេះ គឺជាការចូលរួមចំណែកក្នុងការគាំទ្រ លើកកម្ពស់ និងអភិវឌ្ឍវិស័យអប់រំផ្នែកតន្ត្រីឱ្យកាន់តែមានភាពសម្បូរបែប ស្របតាមកម្មវិធីសិក្សាយុគសម័យថ្មី។ ឧបករណ៍ទាំងនេះនឹងត្រូវយកទៅប្រើប្រាស់ប្រកបដោយប្រសិទ្ធភាពខ្ពស់ ក្នុងការបណ្ដុះបណ្ដាល បំពាក់បំប៉នជំនាញអនុវត្តជាក់ស្តែង ព្រមទាំងពង្រឹងសមត្ថភាពគរុកោសល្យផ្នែកតន្ត្រីជូនដល់គរុនិស្សិតទាំងអស់ ដើម្បីឱ្យពួកគាត់អាចនាំយកចំណេះដឹង និងជំនាញសិល្បៈតន្ត្រីទាំងនេះ ទៅបង្ហាត់បង្រៀនបន្តដល់សិស្សានុសិស្សនៅតាមសាលារៀននាពេលអនាគត ប្រកបដោយភាពច្នៃប្រឌិត និងស្មារតីទទួលខុសត្រូវខ្ពស់។
ក្នុងឱកាសដ៏ថ្លៃថ្លានេះដែរ ឯកឧត្ដមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានថ្លែងអំណរគុណយ៉ាងជ្រាលជ្រៅជូនចំពោះ លោកជំទាវ Ishii Megumi, ឯកឧត្តម ពឹង គិមឆេន ព្រមទាំង លោក Jufuku Takato និងគណៈគ្រប់គ្រងនៃគម្រោង iPVAJ ប្រទេសជប៉ុន ទាំងអស់ ដែលបានចំណាយពេលវេលាដ៏មានតម្លៃ ព្រមទាំងបានឧបត្ថម្ភឧបករណ៍ភ្លេងទាំងនេះ ដល់វិទ្យាស្ថាន ដើម្បីបម្រើដល់ការសិក្សា និងការបណ្ដុះបណ្ដាលគរុនិស្សិតឱ្យកាន់តែមានសមត្ថភាព ប្រកបដោយប្រសិទ្ធភាពខ្ពស់។

០៤ សីហា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia