កម្មវិធីចែករំលែកបទពិសោធន៍នៃការចូលរួមក្នុងសន្និសីទពិភពលោក WALS ប្រចាំឆ្នាំ២០២៥

នារសៀលថ្ងៃទី០៩ ខែធ្នូ ឆ្នាំ២០២៥ វិទ្យាស្ថានគរុកោសល្យបាត់ដំបង បានរៀបចំកម្មវិធីចែករំលែកបទពិសោធន៍នៃការចូលរួមក្នុងសន្និសីទពិភពលោក WALS ប្រចាំឆ្នាំ២០២៥ ក្រោមអធិបតីភាពឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង និងមានការអញ្ជើញចូលរួមពីលោកស្រីបណ្ឌិតនាយិការង លោកនាយករង គណៈគ្រប់គ្រង និងលោកគ្រូអ្នកគ្រូឧទ្ទេសនៃវិទ្យាស្ថានគរុកោសល្យបាត់ដំបងផងដែរ។
កម្មវិធីនេះត្រូវបានរៀបចំឡើងជា វេទិកាចែករំលែកដ៏សំខាន់ មួយ ដើម្បីផ្សព្វផ្សាយនូវចំណេះដឹង បទពិសោធន៍ និងលទ្ធផលស្រាវជ្រាវថ្មីៗ ដែលទទួលបានពីសន្និសីទអន្តរជាតិ ដោយមានការចូលរួមចែករំលែកពីគណៈគ្រប់គ្រងចំនួន២រូប ដែលបានអញ្ជើញចូលរួមសន្និសីទពិភពលោក WALS ប្រចាំឆ្នាំ២០២៥ កាលពីថ្ងៃទី១០ ដល់១២ ខែវិច្ឆិកា ឆ្នាំ២០២៥ នៅទីក្រុងហ៊ីរ៉ូស៊ីម៉ា ប្រទេសជប៉ុន។ វាគ្មិនចែករំលែកទី១ គឺលោក គឹម វិសារ ព្រឹទ្ធបុរសរងមហាវិទ្យាល័យអប់រំវិទ្យាសាស្ត្រ បានចែករំលែកបទពិសោធន៍ទី១ អំពីផែនទីគោចរនៃការដាក់ស្នើអត្ថបទស្រាវជ្រាវដើម្បីចូលរួមសន្និសីទ WALS និងការវាយតម្លៃជ្រើសរើសពីគណៈកម្មការពីវិទ្យាស្ថាន S-TEC និង IMPULS ជាមួយនឹងការសម្របសម្រួលនិងគាំទ្រពី JICA។ បទពិសោធន៍ទី២ គឺកិច្ចការស្រាវជ្រាវដែលបានធ្វើបទបង្ហាញក្នុងសន្និសីទ WALS ស្ដីពី “Comparative Analysis of Mathematics Lesson Plans under the JICA S-TEC Project: Investigating Higher Order Thinking Skills through Teaching Through Problem-Solving and Collaborative Lesson Research”។ វាគ្មិនចែករំលែកទី២ គឺលោកស្រី ហេង តុលា អនុប្រធានដេប៉ាតឺម៉ង់វិទ្យាសាស្ត្រ បានចែករំលែកបទពិសោធន៍លើកិច្ចការស្រាវជ្រាវដែលបានធ្វើបទបង្ហាញក្នុងសន្និសីទ WALS ស្ដីពី “Lesson Study as a means of aligning the new curriculum, textbooks and lesson: A case study of school-based Lesson Study in Cambodia” និង “The shift of the participant's views of the Lesson Study”។
ជាចុងក្រោយ វិទ្យាស្ថានគរុកោសល្យបាត់ដំបង សូមសម្តែងនូវ ការថ្លែងអំណរគុណយ៉ាងជ្រាលជ្រៅ ដល់ JICA, S-TEC និង IMPULS ដែលបានផ្តល់ការគាំទ្រ និងសម្របសម្រួលដល់គណៈគ្រប់គ្រងទាំង២រូប ក្នុងការចូលរួមសន្និសីទដ៏មានសារៈសំខាន់នេះ។ ជាពិសេស សូមថ្លែងអំណរគុណដល់ លោកគ្រូអ្នកគ្រូនៅបឋមសិក្សាអនុវត្តន៍ ដែលបានសហការយ៉ាងសកម្មក្នុងការស្រាវជ្រាវ និងអនុវត្តន៍មេរៀន ដែលជាធាតុចូលដ៏សំខាន់សម្រាប់ជោគជ័យនៃបទបង្ហាញក្នុងសន្និសីទពិភពលោក WALS។

បាត់ដំបង | ០៩ ធ្នូ ២០២៥

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia