ពិធីបិទវេទិកាអន្តរជាតិស្តីពីការអប់រំគ្រូបង្រៀនសតវត្សរ៍ទី២១ លើកទី១ ព្រមទាំងពិព័រណ៍ស្ទែម និងពិព័រណ៍សៀវភៅ នៅវិទ្យាស្ថានគរុកោសល្យបាត់ដំបង

នាថ្ងៃចន្ទ ៨កើត ខែអស្សុជ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៩ ខែតុលា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា អញ្ជើញជាអធិបតីក្នុងពិធីបិទវេទិកាអន្តរជាតិស្តីពីការអប់រំគ្រូបង្រៀនសតវត្សរ៍ទី២១ ក្រោមប្រធានបទ «ការអប់រំគ្រូបង្រៀនតាមគន្លងអប់រំថ្មី៖ ពីគ្រឹះអំណាន និងគណិតវិទ្យាដំបូង ទៅនវានុវត្តន៍ស្ទែម ប្រកបដោយបរិយាបន្ន និងភាពធន់» ដោយមានការចូលរួមពីថ្នាក់ដឹកនាំក្រសួង ដៃគូអភិវឌ្ឍន៍ជាតិ និងអន្តរជាតិ អ្នកជំនាញ អ្នកស្រាវជ្រាវ គ្រូឧទ្ទេស និងគរុនិស្សិត។ ឯកឧត្តមបណ្ឌិត ជា រដ្ឋា នាយកវិទ្យាស្ថានគរុកោសល្យបាត់ដំបង បានរាយការណ៍ពីលទ្ធផលនៃដំណើរការរួមមាន កម្មវិធីសន្និសិទអន្តរជាតិមានអ្នកចូលរួមធ្វើបទបង្ហាញចំនួន ៣៤ វគ្គ បទបង្ហាញគន្លឹះចំនួន ៣ បទបង្ហាញដោយអ្នកជំនាញចំនួន ៦ និងកិច្ចពិភាក្សាតុមូលចំនួន ១ វគ្គ។ ជាមួយគ្នានេះដែរ ពិព័រណ៍ស្ទែមត្រូវបានរៀបចំជា ៦ ភូមិពិព័រណ៍ រួមមាន៖ (១) អំណានដំបូង (២) គណិតវិទ្យាដំបូង (៣) វិធីសាស្ត្របង្រៀន និងវិទ្យាសាស្ត្រអនុវត្ត (៤) បច្ចេកវិទ្យាអប់រំ បញ្ញាសិប្បនិម្មិត និងរ៉ូបូត (៥) ការវាយតម្លៃការសិក្សាដោយប្រើឧបករណ៍ឌីជីថល និង (៦) សន្តិភាព និងសុខុមាលភាពសិក្សា ដែលមានស្នាដៃសរុបចំនួន៦៤ស្នាដៃ។ លើសពីនេះ មានគ្រឹះស្ថានអប់រំ អង្គការ គ្រឹះស្ថានបោះពុម្ពផ្សាយ និងដៃគូពាក់ព័ន្ធ ចំនួន ២២ ស្តង់ ក្នុងគោលបំណងលើកកម្ពស់វប្បធម៌អាន ការស្រាវជ្រាវ ការនិពន្ធ និងការសិក្សាពេញមួយជីវិត។
ក្នុងឱកាសនោះ ឯកឧត្តមបណ្ឌិតសភាចារ្យ ហង់ជួន ណារ៉ុន បានវាយតម្លៃខ្ពស់ចំពោះការខិតខំរបស់គណៈគ្រប់គ្រង គ្រូឧទ្ទេស គរុនិស្សិត និងដៃគូអភិវឌ្ឍន៍។ ឯកឧត្តមបានគូសបញ្ជាក់ថា គ្រូបង្រៀនជាកត្តាសំខាន់នៃកំណែទម្រង់អប់រំ និងការអភិវឌ្ឍធនធានមនុស្ស។ ការពង្រឹងសមត្ថភាពគ្រូត្រូវភ្ជាប់ការបណ្តុះបណ្តាលនឹងការអនុវត្តក្នុងថ្នាក់រៀន ដោយផ្តោតលើអំណាន និងគណិតវិទ្យាដំបូង ការអភិវឌ្ឍវិជ្ជាជីវៈជាប្រចាំ និងការប្រើប្រាស់បច្ចេកវិទ្យាឱ្យមានប្រសិទ្ធភាព។

១៩ តុលា ២០២៦ | បាត់ដំបង

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia