វគ្គសិក្ខាសាលាបំប៉នសមត្ថភាពគរុនិស្សិតលើតេស្តរង្វាយតម្លៃលទ្ធផលសិក្សារបស់សិស្សកម្រិតបឋមសិក្សានៅតំបន់អាស៊ីអាគ្នេយ៍ (SEA-PLM) និងកម្មវិធីអន្តរជាតិស្តីពីរង្វាយតម្លៃលទ្ធផលសិក្សារបស់សិស្ស (PISA)

នាព្រឹកថ្ងៃសុក្រ ទី២០ ខែកុម្ភៈ ឆ្នាំ២០២៦ មហាវិទ្យាល័យស្រាវជ្រាវគរុកោសល្យបានរៀបចំបើកវគ្គសិក្ខាសាលា (Seminar Series) បំប៉នសមត្ថភាពគរុនិស្សិតលើតេស្តរង្វាយតម្លៃ SEA-PLM និងកម្មវិធី PISA ក្រោមអធិបតីភាពឯកឧត្ដមបណ្ឌិត ជា រដ្ឋា នាយវិទ្យាស្ថានគរុកោសល្យបាត់ដំបង។
វគ្គសិក្ខាសាលាបំប៉នសមត្ថភាពគរុនិស្សិតលើតេស្តរង្វាយតម្លៃ SEA-PLM និងកម្មវិធី PISA រៀបចំឡើងដើម្បី៖ (១) លើកកម្ពស់សមត្ថភាពគរុនិស្សិតកំណត់បានពីទិដ្ឋភាពទូទៅ និងលក្ខណៈបច្ចេកទេសនៃតេស្ដ SEA-PLM និង PISA និងពន្យល់បានពីលទ្ធផលសិក្សារបស់សិស្សកម្ពុជានៃតេស្ដ SEA-PLM និង PISA (២) លើកកម្ពស់សមត្ថភាពគរុនិស្សិតក្នុងការរៀបចំតារាងកំណត់គម្រោងលម្អិតវិញ្ញាសា (Test blueprint) និងតាក់តែងធនាគារសំណួរ (SEA-PLM និង PISA QBANK) (៣) ពង្រឹងជំនាញវិភាគទិន្នន័យ និងការប្រើប្រាស់លទ្ធផលរង្វាយតម្លៃ ដើម្បីយកមកកែសម្រួលវិធីសាស្ត្របង្រៀន និងរៀនក្នុងថ្នាក់ឱ្យស្របតាមតម្រូវការជាក់ស្តែងរបស់សិស្ស និង (៤) ជំរុញស្មារតីស្រាវជ្រាវ និងការច្នៃប្រឌិត ដល់គរុនិស្សិតក្នុងការបង្កើតបរិយាកាសសិក្សាដែលផ្តោតលើការដោះស្រាយបញ្ហា (Problem-solving) និងការគិតកម្រិតខ្ពស់ ដែលជាគោលដៅចម្បងនៃក្របខណ្ឌរង្វាយតម្លៃកម្រិតតំបន់ និងអន្តរជាតិ។
នៅក្នុងឱកាសនោះដែរ ឯកឧត្ដមបណ្ឌិត ជា រដ្ឋា បានមានប្រសាសន៍សង្កត់ធ្ងន់ថា ការយល់ដឹងពីតេស្ត SEA-PLM និង PISA មិនមែនត្រឹមតែដើម្បីត្រៀមខ្លួនសម្រាប់ការប្រឡងវាស់ស្ទង់លទ្ធផលកម្រិតអន្តរជាតិនោះទេ ប៉ុន្តែវាគឺជាការឆ្លុះបញ្ចាំងពីគុណភាពអប់រំរបស់ជាតិទាំងមូល។ ឯកឧត្ដមបានជំរុញឱ្យគរុនិស្សិតទាំងអស់ ត្រូវខិតខំក្រេបជញ្ជក់ចំណេះដឹងពីសិក្ខាសាលានេះ ដើម្បីក្លាយជាគ្រូបង្រៀនដែលមានសមត្ថភាពពេញលេញ ក្នុងការបណ្តុះបណ្តាលសិស្សានុសិស្សឱ្យមានបំណិនសតវត្សទី២១ និងអាចប្រកួតប្រជែងបានក្នុងទីផ្សារការងារសកល។

បាត់ដំបង | ២០ កុម្ភៈ ២០២៦

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia