វិទ្យាស្ថានគរុកោសល្យបាត់ដំបង ប្រារព្ធពិធីអបអរសាទរជូន ឯកឧត្តមបណ្ឌិត ជា រដ្ឋា ក្នុងឱកាសឯកឧត្តម ទទួលបានពានរង្វាន់ «នាយកសាលាគរុកោសល្យល្អ» និងខួបលើកទី១១៥ នៃទិវាអន្តរជាតិនារី ៨ មីនា ព្រមទាំងពិធីជូនពរដល់មន្ត្រីចូលនិវត្តន៍

នៅរសៀលថ្ងៃព្រហស្បតិ៍ ២រោច ខែផល្គុន ឆ្នាំម្សាញ់ ត្រូវនឹងថ្ងៃទី០៥ ខែមីនា ឆ្នាំ២០២៦នេះ វិទ្យាស្ថានគរុកោសល្យបាត់ដំបង (BTEC) បានរៀបចំពិធីអបអរសាទរជូន ឯកឧត្តមបណ្ឌិត ជា រដ្ឋា នាយកវិទ្យាស្ថានក្នុងឱកាសទទួលបានពានរង្វាន់ជា "នាយកសាលាគរុកោសល្យល្អ" ព្រមទាំងអបអរសាទរខួបលើកទី១១៥ នៃទិវាអន្តរជាតិនារី ៨ មីនា ក្រោមប្រធានបទ «សន្តិភាព និងសន្តិសុខសម្រាប់ស្ត្រី និងគ្រួសារ»។ ពិធីនេះត្រូវបានប្រារព្ធឡើងនៅសាលពហុបំណងសាគូរ៉ានៃវិទ្យាស្ថានគរុកោសល្យបាត់ដំបង ដោយមានការអញ្ជើញចូលរួមពីសំណាក់ ឯកឧត្តមបណ្ឌិត ជា រដ្ឋា នាយកវិទ្យាស្ថាន លោកជំទាវ តាន់ សូលីដា រួមជាមួយថ្នាក់ដឹកនាំ បុគ្គលិកអប់រំ និងគរុនិស្សិតជាច្រើនរូប។
នាឱកាសដ៏មហោឡារិកនៃពិធីអបអរសាទរនៅវិទ្យាស្ថានគរុកោសល្យបាត់ដំបង (BTEC) រសៀលនេះ ក្រៅពីការសម្តែងនូវការត្រេកអរជូនចំពោះ ឯកឧត្តមបណ្ឌិត ជា រដ្ឋា ក្នុងឱកាសទទួលបានពានរង្វាន់ «នាយកសាលាគរុកោសល្យល្អ» និងការប្រារព្ធខួបលើកទី១១៥ នៃទិវាអន្តរជាតិនារី ៨ មីនា ។ ក្នុងនោះគ្រាដ៏រំភើប និងមានអត្ថន័យនោះ គឺការឡើងថ្លែងចំណាប់អារម្មណ៍យ៉ាងកក់ក្តៅរបស់ លោក លឹម ប៊ុនវី អតីតប្រធានការិយាល័យរដ្ឋបាល បុគ្គលិក និងគណនេយ្យ ក្នុងពេលលោកត្រូវឈានចូលនិវត្តន៍នាពេលនេះ។ ក្នុងស្មារតីនៃក្តីស្រឡាញ់ និងការលះបង់ពេញមួយអាជីព លោកបានរំលេចនូវអនុស្សាវរីយ៍ដ៏មានតម្លៃនៃការរួមសុខរួមទុក្ខ និងមោទនភាពយ៉ាងជ្រាលជ្រៅដែលបានឃើញវិទ្យាស្ថានរីកចម្រើនយ៉ាងរឹងមាំក្រោមការដឹកនាំប្រកបដោយចក្ខុវិស័យ ព្រមទាំងបានសម្តែងនូវការដឹងគុណចំពោះគណៈគ្រប់គ្រង និងសហការីទាំងអស់ដែលបានកសាងនូវវប្បធម៌សាមគ្គីភាពជា "គ្រួសារ BTEC" ដ៏កក់ក្តៅបំផុត ដែលនេះគឺជាកេរដំណែលខាងស្មារតីមិនអាចកាត់ថ្លៃបានសម្រាប់រូបលោក មុននឹងបញ្ចប់បេសកកម្មការងារជូនជាតិមាតុភូមិប្រកបដោយកិត្តិយស និងក្តីសោមនស្សរីករាយជាទីបំផុត។

បាត់ដំបង | ៥ មីនា ២០២៦

Facebook's post below:

---

ភ្ជាប់ទំនាក់ទំនងជាមួយពួកយើង

📞 +855-92 582 772 / +855-86 858 570

📩 info@btec.edu.kh

🌐 btec.edu.kh

Telegram Channel: t.me/btecnews

Youtube Channel: https://www.youtube.com/@BTECMedia