Battambang Teacher Education College

គណៈប្រតិភូគ្រូឧទ្ទេស និងគ្រូបង្រៀនសាលាអនុវត្តន៍នៃវិទ្យាស្ថានគរុកោសល្យបាត់ដំបង ចំនួន ១៦ រូប ចូលរួមវគ្គបណ្តុះបណ្តាលនៅប្រទេសជប៉ុន

គ្រូឧទ្ទេសនៃវិទ្យាស្ថានគរុកោសល្យបាត់ដំបង និងគ្រូបង្រៀននៃសាលាអនុវត្តន៍ ចំនួន ១៦ រូប ត្រូវបាន ក្រសួងអប់រំ យុវជន និងកីឡា ចាត់តាំងជាផ្លូវការ ឱ្យចូលរួម វគ្គបណ្តុះបណ្តាលលើកទី២ ស្ដីពី “ការស្រាវជ្រាវមេរៀន - Research Lesson” នៅមជ្ឈមណ្ឌល JICA ទីក្រុងតូក្យូ ប្រទេសជប៉ុន។

វគ្គបណ្តុះបណ្តាលដ៏សំខាន់នេះ នឹងប្រព្រឹត្តទៅចាប់ពីថ្ងៃទី ២៨ ខែកញ្ញា ដល់ថ្ងៃទី ១៨ ខែតុលា ឆ្នាំ ២០២៥ ដោយមានគោលបំណង សំខាន់ៗដូចជា៖

ពង្រឹងសមត្ថភាពគ្រូឧទ្ទេស និងគ្រូបង្រៀនក្នុងការអនុវត្តវិធីសាស្ត្រ "ការស្រាវជ្រាវមេរៀន" ប្រកបដោយប្រសិទ្ធភាព។
ស្វែងយល់ស៊ីជម្រៅ អំពីដំណើរការនៃការរៀបចំ ធ្វើការសង្កេត និងវាយតម្លៃ មេរៀនស្រាវជ្រាវ ដើម្បីកែលម្អការបង្រៀន និងលទ្ធផលសិក្សារបស់សិស្ស។
ផ្លាស់ប្តូរបទពិសោធន៍ ជាមួយអ្នកជំនាញជប៉ុន ដើម្បីរួមចំណែកដល់ការបង្កើតវដ្តនៃការអភិវឌ្ឍវិជ្ជាជីវៈ (PLC) នៅតាមគ្រឹះស្ថានអប់រំនៅកម្ពុជា។

តាមរយៈវគ្គបណ្ដុះបណ្ដាលនេះ គ្រូឧទ្ទេសនៃវិទ្យាស្ថានគរុកោសល្យបាត់ដំបង និងគ្រូបង្រៀននៃសាលាអនុវត្តន៍ ទាំង ១៦ រូប នឹងដើរតួនាទីយ៉ាងសំខាន់ក្នុងការនាំយកនូវ ចំណេះដឹង និងបច្ចេកទេសគរុកោសល្យទំនើបៗ ដូចជាវិធីសាស្ត្រ Research Lesson មកចែករំលែក និងអនុវត្តបន្ត ដើម្បីជំរុញគុណភាពអប់រំនៅកម្ពុជា ជាពិសេសនៅវិទ្យាស្ថានគរុកោសល្យបាត់ដំបង។ សូមជូនពរគណៈប្រតិភូទាំងអស់ទទួលបានជោគជ័យក្នុងបេសកកម្មដ៏មានសារៈសំខាន់នេះ!